مشاهد والله سبحانه شاهد...

مشاهد يومية اذا فكرنا فيها شوي بتتغير امور وايد بحياتنا
بس ليش نفكر
عادي واكثر ..وحلوة البلاهة

(1)
المشهد الاول:

واقف بالشارع ما يسوي شي

يطالع اللي رايح واللي راد يتلفت ..يسرح..يغني أي شي...الخ
والآذان يعلن وقت الصلاة
ويستمر في وقفته جنه ما سمع شي!!!

وتمر الحلوة .. وراها >> يمشي
عادي واكثر وحلوة الفضيلة

(2)
المشهد الثاني:كل يوم..
يطلعون..يردون..ياكلون..ينامون..يلعبون..يدرسون...الخ
ما تسمع منهم اكثر من كلمة>>> ابي ...
.ينسون او يتناسون
ان في اثنين بالبيت اسمهم
الام والاب
لهم حق عليهم ويدرون بس ..
عادي واكثر وحلو الاحسان
(3)
المشهد الثالث:

يركب السيارة.. .. يتحرك ..يطير

ما يشوف جدامه لا اشارة لا نظام ولا ارشادات سير
ولا حتى....
البشر!!!!!
مو مشكله ابوه ( رجل مهم ) يعني غير
عادي واكثر وحلو الضمير
(4)
المشهد الرابع:
اكثر ناس تعرف تحتفل بالعيد الوطني احنا

انعرف نغني ..نرقص..نطلع مسيرات..

نصف الكلام والفعل هيهات
واذا سالك واحد شنو سويت حق بلدك
قول بلدي لازم تسوي لي !!!
عادي واكثر وحلوة الوطنية

(5)
المشهد الخامس:
يدخل الصف..شايل بايدينه الكتب.. يوقف عند اللوح يمسك الطبشور

ينقش اللوح.. سطور وسطور

يلتفت عليك >> انقل .. وانت عبد المأمور
تقعد ساعة لين تنكسر ايدك... ويجي وقت الامتحان

وانت >> فاتح حلجك ،، جنك داخل امتحان ماده ثانية

تسقط..ويجي نفس الشخص يعطيك درس خصوصي >> وسبحان الله شلون فجأة تصير شطّور !!!
عادي واكثر وحلوة الامانة

(6)
المشهد السادس:
من ثلاث او اربع سنين يحبون بعض

هدايا وطلعات وتلفونات....الخ
يتزوجون..مهر ..عرس..تكاليف..هيصة...حركات
بعد شهر>>> بانت النيـّات

على باب المحكمة.. النتيجة= الطلاق
عادي واكثر وحلوه الصراحة
(7)
المشهد السابع:

متزوج وعنده من العيال اربع
وزوجته على عرش الجمال تتربع
فلوسه تارسة جيوبه وما يشبع
اذا شفته في مجلسه كيف يتصنّع
في كشخته وسكبته حيل متولع
تسمع كلامه تقول عنه مطوّع
وتالي الليل يجيك البيت متسرع
تناديه تحاجيه ابد ما يسمع
يجابل النت وتشوفه حيل مستمتع
يشوف فلانه وفلانه وعينه تبي تطلع
ينادي وقت الصلاة تلاقيه يتمطع
يواصل ويواصل..ولا في قلب لله يخشع
عــــــــــادي واكثر وحلو الإيمان

(೭)
المشهد الثامن :

قلم .. حاسوب

نتيجته فكر او احساس مكتوب
نشتريه من هني وهناك
تختلف اشكاله والوانه
تماما مثل البشر .. في مضمونهم ، وفي اشكالهم وطبع القلوب

لو يشوف الوضع الحين
والله يتوب
كان وسيلة لترجمة اللي نقوله
يترك اللي بخاطرنا شاهد علينا

مادرى المسكين شسوينا

عادي واكثر وحلو التحضر !!

المشهد التاسع :
كان هذا المشهد الحيّ :
جاني يقول انا اكتب.. واقدر اتفنن واسوي العجب
واتكتك وشوفيني وانا كاتب متكتك ،، ومو مهم من وين وشلون
المهم اني لازم حاضر اكون
انتي كتبتيه او سرقتيه... انتي فكرتي فيه او نسختيه
بالنهايه
انا اكتب وانتي بعد
وانا اسمي موجود وانتي بعد ،، ويمكن انا صرت شخص مميّز بالعدد
وانتي للحين بعيده كل البعد
من قال في احد يهتم
من يقرا اصلا ومن يفهم
كله واحد وليش التعب
مادام الحل موجود والاوراق منثوره بكل مكان تحصلينها بكل برود

بس يبيلها شوية فن وتصير باسمك وتصير الكاتب الواعد الموعود
ضحكت وقلت...
والله عـــــــــــــــــــــادي
واكثر من عادي
دام نمر ...ما نقرا ونعلق ...
ثانكس ،، ابدعت
وااااااااااااو
شدعوه للحين ما فهمنا الفرق !!!!

وحلوة الثقة