حطي راسج على كتفي
اجمع دموعج بكفي
اغسل قلبي بطهرج
احلف عمري ما اضرج
عاتبيني ماعليه
لوعمري عطيتج ما وفيت
لو بحضني خذيتج ما هقيت
امسح احزانج اليوم ..........
قمنا نفكر بصوت عالي
قمنا نتحرك بريموت مالي
كلهم يقولون علشانج
بس منو اللي فكر بشانج
منو اللي حط حيلكم بينكم
منو اللي فرقكم حتى يسود
منو ؟؟؟؟؟؟؟؟
اليوم يومج علي صوتج
علميهم انه الوطن يسكنك مو بس تسكنه
قولي لهم ...
هذي الديرة امانه
لاهي كرسي ولا مكانه
هذي الديرة مواقف
لاهي كلمة او حرف ناشف
ما يكفي ترفع علم
وتسلط قلم
عاتبيهم لا تسكتين
إسأليهم عن الاولين
وريهم شلون كانو عايشين
كانت الديرة همهم
ما كانت الالقاب تهمهم
إساليهم عن الامانه
وشنهو الكرسي اللي ذبحوج لاجل يعلو شانه
متى رضيتي عنا اخر مره
متى ابتسمتي من يوم صرتي حره
متى قدرتي ترفعين الراس
متى حسيتي اننا حراس
متى اخر مره متى ؟؟
عاتبينا ماعليج قولي اللي بقلبج استاهل عتابج دام اني ما وفيت...
------------------
شتستفيد
لو تحتاجني وما مدلك ايد
شتستفيد
لو تكثر سجاجينك
وانا اباركها وازيد
شتستفيد
لو تنكر جذورك
وبشدتك ما تلقى عضيد
شتستفيد
لو تنام الليل ما تصبح
او تغيب وما نعدك فقيد
شتستفيد
لو ينسيك الكرسي
انك من تراب وللتراب اكيد
لو ينسيك قدرك
انك عبد من ضمن العبيد
شتستفيد
-----------
كلن واقف في مكانه
كلن واقف في ثبات
لو توصل حدود الاهانه
ما حركت شي مات
من ضمير صار صفقه
ومن ضمير على انحياد
ناطر (..........) صفقه
ويرقص على ظهور العباد
عطرني بعطر الارقام
عطرني بعطر الارقام
وبخّر المخبى لسنين جدام
لبسني ثوب الكراسي
عدل بالنفاق راسي
واكتب لك من حساب صدقي شيك بلا رصيد
تصرفه من بنك ياليت وتصرفه على خيبة الحلم السعيد
انت وصلت
انت وصلت
بس شلون
مو لاني انا انحنيت
ركبتك على ظهري ومشيت
حملتك امانة البيت
تذكر لو انك نسيت
-------------
اللي كتبته اليوم شي ما اكتمل يمكن المصاب اكبر من الكلام
يحتاج فعل يحتاج نتحرك كل شخص من مكانه ومن واقعه ومن ظروفه يقدر يسوي شي
-------------
اللهم احفظ هذا البلد
من شر الحسد
ومن شر الحقد
ومن شر إنسان تنعّم و ما حمد
اللهم احفظ هذا البلد
-----------------------
اعتذر عن غيابي الغير مبرر
ابولطيف .. شكرا لسؤالك واهتمامك ما تقصر يابولطيف عساك على القوة لا خلا ولا عدم ..
هناك 22 تعليقًا:
متى ابتسمتي من يوم صرتي حره
لله درك
لجمتي اللسان
وضيعتي الكلام
الم
امل
والله نفس بو لطيف أكثر مقطع لجمني
"متى ابتسمتي من يوم صرتي حره"
عزيزتي هذا الإبداع
ما شاءالله لج أسلوب فوق الرائع وكلماتج تمس القلب من عماميقه :))
الله يحفظج
وتسلم يمناج اللي خطت هالإبداع
:))
هذا المقطع بروحه قصيدة
مشكوره
قولي لهم ...
هذي الديرة امانه
لاهي كرسي ولا مكانه
هذي الديرة مواقف
لاهي كلمة او حرف ناشف
ما يكفي ترفع علم
وتسلط قلم
عاتبيهم لا تسكتين
إسأليهم عن الاولين
وعطني ولعه
ياهلا وغلا بولطيف
تشوف شي يرضيك من قلب وتبتسم بهدوء ورضى اكيد مثلك يعرف هذا الاحساس
ونفس الشي الوطن
الله يحفظك يا ابولطيف
ويوفقك للخير
YIN
فديت عماميقج انا
انتي الابداع كله والله
سعادتي بوجودج لا توصف
عاجزة عن شكرج وسعيدة بحضورج
:))
The boss
حياك الله
شاكره تواصلك دايما
واحساسك الجميل بالكلمة
:)
شتستفيد
من اجمل ماكتبتِ
رائعه
رائعه
"كلهم يقولون علشانج
بس منو اللي فكر بشانج
منو اللي حط حيلكم بينكم
منو اللي فرقكم حتى يسود"
الاناني الي ماتهمه الا مصلحتة وهو يدعي مصلجة الوطن
عجيبه كلماتج ماشاء الله ,موفقة :)
شتستفيد
لو تحتاجني وما مدلك ايد
شتستفيد
لو تكثر سجاجينك
وانا اباركها وازيد
شتستفيد
لو تنكر جذورك
وبشدتك ما تلقى عضيد
شتستفيد
لو تنام الليل ما تصبح
او تغيب وما نعدك فقيد
شتستفيد
لو ينسيك الكرسي
انك من تراب وللتراب اكيد
لو ينسيك قدرك
انك عبد من ضمن العبيد
شتستفيد
***
اتعبتينا
يا تراب الكويت
اتعبتينا
barrak
شتستفيد كانت عنوان البوست بروحها
لكن الوضع الراهن فرض نفسه
شهادة اعتز فيها منك والله
شكرا
:)
Sweet revenge
حياج الله حبوبة اعتز في كل كلمة تضيفينها لـ تراب
شكرا شكرا :)
enter-q8
زارتنا البركة والله
الوضع متعب شنسوي بعد
لكن الامل بالله سبحانه موجود
الله يصلح الاحوال
شكرا :)
السكوت يلف بيتي..
وبيتي كان بحاجة لبيوت الشعر
أوزان قلبي باهته
وغابة حياتي ساكته
ملتني أوراق الصبر
ملتني وهي تنتظر
ولما وصل صوتك جريح
صارت السكتة حكي
وصارت الدمعة حبر
ياللي في اسمك دفا
كل الدفا..
صيف هالدنيا وشتاها
يجهله ومايعرفه
قلبي حب وحب..
جرب واكتفى
لكن الحب الحقيقي فيك قلبي صادفه
انى والنسيان طبيعي
ويا ماتاريخ اشتعل في دفتري ثم انطفى
ويا ما اسماء انتهت
ويا ما اسماء انطفت
اما اسمك يربك النسيان
لي جات أحرفه
انتحمل لو تهب العاصفة
ونوقف اذا الغير اختفى
نواجه الموجة الغريبة
نواجه الموجة القريبة..يا وطنا بكل وفا
ياللي حبك ما قدرنا نوصفه
إنحبك
إنحبك عزيز
من سماك العالية الارصفه
شعبك..نخيل
يعيش واقف
يموت واقف
ينكسر ما ينحني
ينتحر ماينثني
شعبك نخيل
وأكبر دليل
يهددون ..يخطفون..ينسفون
غير الشجاعة مالفوا عندك بديل
ياللي شعب ماعرف واحد ذليل
اقسم ويقسم
أبوي وطفلتي
اقسم ويقسم معانا كل اصيل
الموت في حبك جميل
الموت في حبك جميل
الأسير الشهيد باذن الله
فايق عبدالجليل
تراب الكويت...شكرا على عفوية المشاعر اللي سطرتيها حروف خوف ووجل على تراب الوطن
وان شاء الله الوطن بخير ..الكويت بخير
الـسلام عليكم يا تـرابــــــــ
(كلهم يقولون علشانج
بس منو اللي فكر بشانج)
صدقتي بصراحه بكلامج محد يفكر بشانج
هذي صارت مجرد كلمه تنقال عشان يوصل
مكانه عاليه لا اكثر ولا اقل وطبعا مو الكل بس الاغلب :)
(عاتبيهم لا تسكتين
إسأليهم عن الاولين
وريهم شلون كانو عايشين
كانت الديرة همهم
ما كانت الالقاب تهمهم
إساليهم عن الامانه)
آآآآآآآه الامانه الله يخلي لنا الكويت
ويخلينا لها ويخليج ياترابــ لها ولنا
وطني ..وطن النهار أنت النهار يا وطـني
أنت الأمـل لي هل أنت النـهار لي طل
ويـاك عبرت الزمن الله شكثر يا كويت
قلبي خـفق يا كويت شلتك بيوفي وطن
أنت الوطن بس أنت أنت الأصل بس أنت
أنت الحيــــاة بس أنت
ـــــــــــــــــــــــــــــ
الله يعطيج العافيه واتمنى الكل يملك مثل شعورج للوطن
دمتي بخير
صلاح الانصاري
اهلا وسهلا
اضافتك قزّمت حجم الكلمات
وعظّمت الاحساس بالحب
اللهم آمين اللهم آمين
شكرا لك شكرا لسعة صدرك ومرورك
احترامي :)
كونسلر
عليكم السلام ورحمة الله وبركاته
لا اعلم كيف اشكرك
فدعمك يثلج صدري واهتمامك يدفعني للمزيد
لا ننكر وجود الخير نعم لكن الشر يعم
وهذي المشكله
وان شاء الله وطن النهار سيبقى كذلك
فهو اطهر من كل المطامع
لك شكري وامتناني وتقديري لتشجيعك
دمت :)
الكل يتغنى فيها
بحبها
بقدرها
بشانها
وعلى شانها
لكن القليل من يعرف من هي الكويت
من يراها ارض
اخرون يرونها فرصه للربح
وغيرهم ينظرونها كفريسه
نحن نراها وطن
تسلم ايدج حبيييت ابياتج والله
والمشكله ان احنا نعرف نعبر عن هالحب
بس ودنا نسوي شي اكثر
ودنا
sn3a
هلا وغلا بزينة البنات
اكيد ودنا لكن وجود الحب كأساس يدفعنا نحقق لها كل شي بضمير ومن منطلق حب بدون اهداف شخصية
ولو قدرنا اكيد بتتغير الاوضاع
شاكره مرورج العذب
موفقه يارب
:)
صح لسانج يا تراب
الاوضاع والله ماتسر
و الكل شاد
و انتي لمستي جروح
عسى نعرف نداويها
خوش عوده
:)
ضاد
صح بدنج واحساسج الجميل
يسعدني التواصل على رغم المصاب
انتِ صاحبة قلم مميّز وجذاب
الله يوفقج
:)
قريت المدونة كاملة
وبجاني هالبوست
الله يا حبج يا كويت
احسنتي
زوز
مرحبا بزيارتك الاولى واتمنى دائما تجدين ما يسعد قلبك
وصدقيني مقصرين بالاحساس والكلام
وتستاهل الكويت عسى الله يحفظها يارب
شكرا لك
بحفظ الرحمن :)
إرسال تعليق